富士山貓貓口罩及其他口罩出貨更新統一通知。
知道大家都好心急，經過同舟 Unite連日來嘅努力，所有預售口罩出貨已經接近尾聲。同大家報告一下進度。
1）富士山貓貓口罩如果你選擇自取，所有客人最遲今日辦公時間內會收到同舟 Unite電郵通知。（由於人手有限，較早前一律inbox表示未有收到自取通知嘅客人，同舟 Unite唔會逐個回覆。如果你今日辦公時間完咗仲未收到電郵，請麻煩inbox或者WhatsApp同舟 Unite服務熱線）
2）如果你選擇咗使用順豐速遞或者top-one送上門,同舟 Unite今日會將所有預售訂單全部交到運輸公司嘅同事手上面。
同舟 Unite亦都有留意住大家嘅意見反映，統一回應一下大家嘅疑問：
1）點解未出晒所有門市或者阿布泰就有得賣貓貓口罩？
今次因為富士山貓貓布料印刷其中櫻花嘅顏色出現咗誤差，所以同舟 Unite要重新製作過新嘅布料，所以本來預鬆左嘅到貨日子，富士山貓貓口罩只能夠如期10號先至開始出貨。但係同舟 Unite嘅冬日貓貓口罩就提早左大概5號已經開始出貨。所以同舟 Unite出晒所有淨係買咗冬日貓貓口罩嘅客人之後，預留左之後夾單一齊買嘅客人未出貨口罩數量，同舟 Unite就開始安排亞布泰同門市都直接出售冬日版貓貓現貨。
至於富士山口罩，同舟 Unite到目前為止全部所有嘅現貨都係拎嚟交俾已經預售左嘅客人，未有任何途徑或門市售賣現貨中。不過聽日開始就會有現貨賣啦，因為今日已經出晒所有貨，想睇咗現貨先至買嘅客人可以留意番。至於上星期六日oki辦公室義賣緊嘅富士山口罩就係同舟 Unite捐贈比佢哋嘅10%產能，佢哋義賣所得嘅款項將會用嚟營運oki辦公室及幫助更多浪浪。
2）點解預售冇禮物，遲買反而有禮物？
同舟 Unite都見到好多客人批評同舟 Unite咁樣嘅營銷手法非常不恰當，覺得同舟 Unite滯銷所以要諗辦法送禮物促銷😩😱。
冤枉啊，有今次明信片禮物純粹係因為剷屎親訪同舟pack 貨重地，同舟 Unitemarketing同事想有啲禮物仔可以送俾兩邊嘅粉粉，所以製作左100份明信片，直接送俾直播當日見到同舟 Unite戴住冬日口罩靚靚而再買嘅朋友仔。
當見到大家覺得唔開心，預售反而冇禮物嘅時候，同舟 Unite都覺得係自己疏忽咗，亦都有諗過全部買咗冬日同富士山貓貓嘅客人都送一套明信片，但係因為當時有好多淨係買咗冬日貓貓口罩客人同舟 Unite已經全部出晒貨，冇途徑可以再次俾返佢哋，所以如果同舟 Unite真係全部人都送，會製造左已經收咗貨嘅人反而冇呢個唔公平嘅現象。
Oki同埋同舟團隊都好多謝大家咁鍾意貓貓口罩同埋同舟 Unite製作嘅小禮物🎁，所以同舟 Unite決定會再次製作冬日白川鄉明信片再加一款新嘅賀年明信片，然後安排直接送俾所有曾經買過貓貓口罩嘅朋友仔，詳情稍後公布。
3）點解明明講好咗10/12開始陸續出貨，到今日先至出晒？
同舟 Unite幾個系列嘅口罩工廠全部都按時交貨俾同舟 Unite，然後就馬不停蹄地安排出貨。希望大家能夠理解嘅係同舟 Unite都確實需要時間去做分流同包裝。每日包裝出3000盒左右口罩已經係同舟 Unite嘅極限，同舟 Unite連星期六日都有OT，就係希望大家可以盡快收到各款靚靚口罩。
4）點解收到電郵可以自取，星期日下午去尖沙咀竟然冇貨拎？
呢個真係要同大家講聲唔好意思，因為尖沙咀門市地方淺窄，同舟 Unite將貨放喺倉度，就嚟冇貨嘅時候先至有倉度調返落門市比客繼續拎，當日因為門市長期有客人排隊等拎口罩，同事疏忽咗提早通知倉務同事要安排送貨落門市補給。令到期間有大概20位客人白行一趟或者要等，真係非常抱歉。同舟 Unite已經將所有客人自取嘅口罩全數送咗落門市，保證唔會再有客人到咗而未有口罩拎嘅情況發生。
5）點解幾個系列口罩都買齊，但係你哋又要客人分幾個日子去拎貨？
同舟 Unite做預售嘅時候，每個系列都訂咗個出貨日子。如果客人分開幾次或者幾張單買唔同系列，好抱歉，同舟 Unite嘅系統做唔到夾單，同舟 Unite只能夠按返嗰個系列嘅口罩出貨時間正常程序處理。所以就會有客人買咗唔同系列，要唔同日子去門市取貨，同舟 Unite完全理解客人想等埋一齊然後先至拎，咁樣唔使行幾轉。客人係可以自行調整取貨日子，同舟 Unite門市同事亦都會酌情處理不另收存倉費用。不過，門市地方淺窄，同舟 Unite都懇請各位盡快前往自取，大家亦都可以好快有靚靚口罩戴。
無論點都好，幾個系列嘅口罩同舟 Unite今日辦公時間內將會趕工全部出貨完成。
多謝大家對同舟團隊嘅支持同信任。
