各位，基於有人話我龜縮唔正視意見，表示要掉西瓜搵我。
大佬吖！你鬧緊我，我講乜對你來講都冇意義，你又唔會聽，你又覺得我狡辯，我同7哥集中火力處理問題核心好過啦！
識同舟 Unite兩公婆嘅人都知同舟 Unite係咩人，當初同舟 Unite唔係食飽飯冇屎屙走去造口罩！
同舟 Unite亦係有承擔嘅人，有事絕對會面對，對自己嘅出品100%絕對負責任。
雖然呢幾日不斷半夜三更被電話騷擾，甚至一大輪粗口問候屋企人，有人甚至乎話要搞埋我個仔，我嘅同事俾人鬧係狗，打份工要俾人問候埋娘親，真係有咁嘅需要咩？
邊一個係人邊一個係鬼，
邊一啲人係善意提醒，邊一啲人係惡意中傷，我全部心中有數。
面對着呢一啲有時真係有啲氣餒… 但同舟 Unite望返自己個初心，由12月疫情到而家，一切只為做應該做嘅事而搏盡無悔！初哥並冇咁容易放棄，只會繼續努力💪🏻！
好！呻完。
有關同舟口罩資訊更新：
1）工廠於琴日黃昏已經幫同舟 Unite全部準備出貨嘅口罩重新qc完畢，同舟 Unite聽日開始會安排寄出東方文具及小魔怪預訂六月份口罩，估計6月30日前會全部交晒比運輸。
2）對於較早前任何渠道購買嘅同舟口罩出品，已經收貨嘅各位如果質量有任何問題，可以聯絡你購買渠道嘅CS，同事會安排閣下到火炭更換。
如果閣下唔方便到火炭，請同CS溝通，同舟 Unite同事會酌情處理。
3）較早前收集意見嘅時候，有部份細面女士反映同舟口罩的耳線偏長（呢個設計主要考慮點係想男士帶得較為舒服，唔會耳仔痛，而女士就自行打個結），奈何，日日打結實在唔係辦法，同舟 Unite今個星期會推出貼面版本（耳線較短）。最先會係現貨發售，收集一下各位用家意見，稍後時間先至會考慮為已經訂咗六個月嘅客人自由選擇將預訂口罩轉為貼面版本。
4）關於小童口罩，同舟 Unite繼續努力當中。如果有小童口罩出售，同舟 Unite會比預訂咗六個月嘅朋友仔優惠價格訂購。繼續都係同一句，同舟 Unite希望去到有九成把握先至公布。
送多粒花生🥜俾大家😝
對於我幾多日換一次手袋。到底有幾多個手袋，唔使估。
女人嘅衣櫃同心情一樣，都係高深莫測，應該唔係一兩張相就可以揭露嘅事情。對於一個貪慕虛榮嘅港女來講，買手袋就係我最大嘅興趣，呢個世界上面應該冇任何野可以阻止到，多謝大家讚美我嘅手袋。亦都多謝我老公縱容我賺錢淨係用嚟買手袋就可以。🥰
7嫂老闆娘
