啱啱踏入四月份，今日起我會慢慢逐步同大家講嚟緊開售嘅流程，大家唔駛心急我哋仲有超過十日時間慢慢講，首先我哋今日同合作方開完會，專業嘅合作方今次重新為我哋度身訂造咗一個全新而且絕對公平嘅網上抽籤程式，大家唔駛心急今晚我會先同大家講重點先，之後未來十日慢慢同大家講細節，大家亦都唔駛咁快去下載個app，因為依家下載咗過多幾日大家都要再更新個app㗎，而今次為我哋提供呢個app嘅就係 The Gulu 。

首先我哋會於4月13號至4月17號（星期一至星期五）每日早上9:30，傍晚18:30 分兩次派籌抽籤，每次1000個名額，合共有10000個名額，每次抽籤大約5分鐘就知結果，先試咗頭五日後馬上作檢討再增加名額同數量。
抽到嘅就會直接跳入付款介面，付款方法暫時分別有Visa，Master，八達通，WeChat ，Alipay ，（八達通要用app唔好諗住用自己張八達通呀😂)
我哋先試頭呢五日，然後馬上作出檢討，務求一日比一日做得更加好，所以頭呢10次抽籤每人限購一盒，成功購買嘅會進入保護區，保護區為期14日，系統會自動倒數。
抽籤並唔係鬥快先到先得，所以絕對公平，你用app抽籤嘅時候，如果抽到的話系統會對應到你手機上嘅機身號碼，進入保護區係會用電話號碼同機身號碼嚟鎖定進入保護區，到下一次抽籤嘅時間你再用個app嗰時係抽唔到籤嘅，直至系統倒數時間完畢你就可以再次參加抽籤。
而同日4月13日晚上我哋會另外會開放兩個渠道同數量分別只係俾醫護人員同埋長者以Google form登記購買，各位年青人就要幫下長者做呢個登記動作，登記嘅資料只需姓名，電話，電郵，如要派件就要收件地址，最後要上載埋醫護人員卡或者長者咭，我哋要呢樣野只係要來核實身份，絕對唔需要其他涉及個人私隱嘅身份證明文件。當然登記購買都係有一定嘅數量，因為我哋希望大家當買到之後口罩係即刻到手，所以會有限定嘅數量。
所以各位長者同醫護人員抽唔到簽亦都可以個別登記購買，但係如果抽到簽後你再諗住登記購買，我哋嘅系統亦都會有你已經抽到籤嘅記錄，咁樣確保唔會可以重複購買。如果當晚登記名額滿咗而其他買唔到嘅長者同醫護人員4月14號早上就又可以繼續抽過。
今晚大家就消化一下以上嘅重點先，之後我哋慢慢再逐一講解，然後我會在開售之前來一個大總結Q & A，而下星期我哋亦都會準備一段教學視頻俾大家。
