【PrimeHK 真誠剖白：道歉啟事】
尋日PrimeHK通知大家SGS HK（香港通用檢測認證有限公司）會延遲發出PrimeHK 口罩證書嘅消息，其實PrimeHK同大家一樣都感到意外同失望，因為SGS 原先預計五月頭可以出驗證報告比PrimeHK。而口罩亦如期生產，但現時礙於《商品說明條例》無法如期出貨，PrimeHK感到十分抱歉。根據SGS嘅答覆，PrimeHK預計五月底前將取得結果，到時PrimeHK就會向大家公佈同立刻開始發貨。
PrimeHK喺呢兩、三個月披星戴月咁工作，無論喺建立無菌、無塵嘅工廠，定喺選購黎自世界各地嘅熔噴布，同埋參加香港品質保證局（HKQAA）推出嘅「醫用防護口罩產品認證計劃」等等，目的都喺希望能夠為香港人提供優質口罩。目前市面上比起兩個月前多咗好多口罩供應，但PrimeHK知道大部分香港人都對香港生產嘅口罩有較大嘅信心同一份情感，實在好感謝大家。
PrimeHK真誠地希望大家可以同PrimeHK一齊等埋份報告，PrimeHK好有信心口罩能夠達到ASTM Level 1標準。PrimeHK好希望可以同你哋建立長期嘅良好關係：
1) PrimeHK 選用嘅熔噴布質素合符Level 2標準，而且SGS嘅部分檢測結果顯示口罩嘅效能合成血液穿透阻力 ≥ 120 mmHg（Level 2）。
2) 為表示PrimeHK嘅歉意同誠意，PrimeHK 會為願意繼續同PrimeHK一齊等待SGS報告嘅客戶提供每盒港幣$10嘅 Coupon（即訂購咗兩盒口罩嘅客戶會有兩張），作為日後喺 PrimeHK 購買口罩之用。
3) 明白有啲客戶急需使用口罩，喺諮詢過法律意見後，PrimeHK現推出「PrimeHK搶先體驗計劃」，俾已訂購口罩嘅客戶喺 ASTM Level 1 嘅完整檢測報告及證書發出之前收到口罩。無論有無參與該計劃嘅客户，收到嘅口罩都會喺同一批。PrimeHK會下星期喺Facebook專頁公佈參與計劃嘅連結，到時客戶只需按入連結填寫相關資料以表明願意喺PrimeHK未有ASTM Level 1 嘅完整檢測報告及證書下，優先領取口罩。收到表格後，PrimeHK會根據客戶原本選擇既運送方法，立刻開始發貨或發送取貨通知電郵。
PrimeHK 雖然只喺一間Startup 公司，亦願意承擔責任。如有訂購者因 PrimeHK 未能如預期喺五月頭開始發貨而要求退款，PrimeHK願意提供全額退款。如欲退款既客戶請電郵至cs@theprimehk.com，PrimeHK會喺5個工作天內回覆。
根據海外同香港嘅專家預計，疫情可能會持續一至兩年，直至有效且安全嘅疫苗出現。所以相信未來仍有一段時間，需要佩戴口罩以減低感染風險，PrimeHK會一直與香港人同行，齊心抗疫。
