好重要嘅事，所以我唔出圖
1）大家見到SOSoVan唔好沖出嚟,，你舉一舉手如果我見到你，喺安全情況之下我就會停低，但係其他司機哥哥未必一定會，所以安全第一
2）我察覺大家過嚟SOSoVan，有時人同人之間大家都企得相當近，請保持適當距離，有貨就有，如果唔夠賣我會再嚟一次，千祈唔好過度聚集

3）大家唔好跨區，飛的士坐地鐵都唔好，Soso Mask四圍去都希望方便大家，唔係要大家四圍走，唔係Soso Mask嘅辛苦就唔值得
4）唔好囤貨，除咗Soso Mask之外香港仲有好多有品質嘅口罩廠供應，買唔到SOSoMask並不代表人生無色彩（可能只係少咗啲啫），都係安全第一最重要。顏色口罩係希望「苦中一點甜」並唔係希望大家好辛苦咁撲口罩，請唔好辜負Soso MaskSOSoTeam不眠不休工作嘅苦心-隨緣
5）我唔能夠每次都跟車，有時要靠同事，所以大家錫住我啲同事
6）如果見到我，大家想開開心心簽名影相隨便開聲，不過有時忙嘅時候請大家等一等，我盡量安排完貨就即刻過嚟
7）寫寫下唔記得仲有咩講
8）雖然Soso Mask未有網上店，「May姐生活百貨」(May姐+男伴）同「美姸舍」（Winnie姐)都正在幫大家處理郵購，俾啲空間佢哋，佢哋亦都日以繼夜咁樣為大家服務
9）疫情到今天有不少隱形患者，如果大家可以的話盡量帶多一兩個口罩喺身邊，去完人多嘅地方或者出太多汗都請你換一個口罩，保障自己亦都保障其他人
10）Soso Mask依然堅持底、面及熔噴布三層材料都用30g，所以如果你用開相對比較薄嘅口罩唔好再鬧我焗，鹹魚青菜，希望大家理解
祝大家平平安安捱過疫情
SOSoMask創辦人
鄭承隆